«Ауру-сырқаудан тазартып беремін». Әжей 600 мыңды қолды етті

Солтүстік Қазақстанда 67 жастағы кейуана алаяқтық жасады деген күдікпен ұсталды, деп мәлімдеді полиция басқармасында.

Бұл туралы Orda.kz хабарлады.

Аудандық полицияға «алаяқтық» бойынша шағым түсті.

Зардап шегушінің айтуынша, ол облыс орталығындағы Булаево базарында жұмыс істейді. Күн сайын бір әжей келіп «аурудан тазартып беремін» деп, өз қызметін ұсынған. Зардап шеккен келіншек бастапқыда күмәнмен қарап, артынша үлкен кісінің сөзіне сеніп қалған.

Емші бастапқыда тауық жұмыртқасымен тазарту рәсімін жасаған. Кейін емші ақша мен алтынды өртеу керек дейді. Бірақ барлығын өзіне алып қалады.

Ол алданып, 20 мың теңгесі мен 600 мың теңгеге бағаланатын 2 алтын бұйымын қалай бергенін өзі білмей қалады. Артынша, есін жиған соң, емшіге хабарласса, ол тұтқаны көтермеген.

Алаяқтық жасады деген күдіктіні Мағжан Жұмабаев аудандық полиция бөлімінің криминалдық полиция қызметкерлері ұстады.

Анықталғандай, 67 жастағы әжей Ақмола облысы орталықтарының бірінде тұрады. Ол достарымен кездесуге бір күн қалғанда Булаево базарына барған.  

ҚР Қылмыстық кодексінің 190-бабы бойынша сотқа дейінгі тергеу басталды.