Ауру баланы зорлаған 5 баланың әкесі 22 жылға сотталды

Ақтауда эпилепсиямен ауыратын 13 жасар қызға оральды зорлық көрсеткен 5 баланың әкесі 22 жылға сотталды.

Бұл туралы «НеМолчиKz» қоры хабарлады. 

«Осы іс үшін аяғына дейін күрескен қыздың отбасына және қыздың апайына алғыс айтамыз. Айыптының адвокаты мен қорғаушылар тарапынан көрген қысымға қарамастан бұл жағдайға олар төзімді болды», — деді «НеМолчиKz» қорының басшысы Дина Смайылова. 

Бұл сот ісі жәбірленуші тарапқа оңай болмады. Мысалы, тергеу жүргізіліп жатқан кезде эпилепсиямен ауыратын қыздың ұстамасы ұстап қалып, жедел жәрдем көлігімен алып кетті. Сондай-ақ, тергеу кезінде қыздың анасы да ауруханаға түсті. 

«Қорлық көрген қыз үшін күресті оның нағашы апайы жүргізді. Ол бізге үнемі хабарласып, болып жатқан жағдаймен таныстырып отырды. Қыздың ар-намысы үшін адвокаттардың бар қарсылығына төтеп берді», — деді «НеМолчиKz» қорының басшысы Дина Смайылова.  

Еске сала кетейік, бұл туралы Orda.kz салған ақпаратта қыздың туыстары айыптыға әділ жаза берілмей, құтылып кетеді деп қауіптенгенін айтқан болатынбыз. 13 жасар қыз мүгедек, эпилепсия ауруы үшін невропатологта есепте тұрады. Зорлық көрсеткен ер адам 5 баланың әкесі. Ол жәбірленушіні оральды жыныстық қатынасқа түсуге мәжбүрледі.  Биоматериалдар жиналып, тергеу шаралары жүргізіліп, оның кінәсі толық дәлелденді.