Ауғанстан мен Пәкістан арасындағы келіссөздер тағы екі күнге созылады

Ауғанстан мен Пәкістан арасындағы келіссөздер Стамбұлда тағы екі күнге жалғасады, деп хабарлайды Orda.kz.

Tolo News порталы хабарлағандай Стамбұлда сенбі күні басталған Ауғанстан мен Пәкістан арасындағы бейбіт келісім жасасу және аймақта бейбітшілік пен тұрақтылықты қамтамасыз етуге бағытталған ортақ стратегия әзірлеу жөніндегі келіссөздердің екінші кезеңі тағы екі күнге созылады.

Бұған дейін Дохада өткен алғашқы раунд барысында тараптар атысты дереу тоқтату туралы келісімге келген еді.

«Сенбі күні ауған және пәкістандық делегациялар арасындағы келіссөздер жергілікті уақытпен шамамен сағат 20:00-де (Мәскеу уақытымен бірдей) аяқталды. Келіссөздер тағы екі күн жалғасады деп күтілуде» деп жазылған басылымның Telegram-арнасында жарияланған хабарламада. 

Пәкістандық бұқаралық ақпарат құралдарының хабарлауынша, Исламабад делегациясы кездесуде «Пәкістан тәліптері қозғалысы» (Техрик-е Талибан Пакистан, ТТП) тарапынан туындаған қауіпке қатысты «нақты және батыл» ұстанымын танытқан.

Tolo News мәліметінше, келіссөздер барысында талқыланған өзге тақырыптардың қатарында екі елдің қауіпсіздік саласындағы күш құрылымдары арасындағы үйлестіруді арттыру және шекаралық ынтымақтастықты жақсарту мәселелері болды.

Ауғанстан делегациясын елдің ішкі істер министрінің орынбасары Рахматулла Наджиб басқарып отыр. Келіссөздерде атысты тоқтату режимін ұзарту, екі мемлекеттің аумақтық тұтастығын, оның ішінде әуе кеңістігін сақтау мәселелері қарастырылуда. Делегация құрамына ішкі істер министрінің інісі әрі тәліптердің жоғары лауазымды өкілдерінің бірі Анас Хаккани, Ауғанстанның Катардағы елшісі Сухейль Шахин, Ауғанстан Сыртқы істер министрлігінің ресми өкілі Абдул Кахар Балхи және өзге де мемлекеттік қайраткерлер кіреді.

Пәкістан мен Ауғанстан арасындағы жағдай 9 қазанның кешінде Пәкістан әскери-әуе күштері Кабулдың бір ауданында әуе соққысын жасап, онда Пәкістан тәліптерінің үш жетекшісін жойғаннан кейін күрт шиеленіскен. Сондай-ақ соққы Ауғанстанның Пактика провинциясындағы базарға да жасалып, көптеген сауда нысандары қираған. Ауғанстан Қорғаныс министрлігі бұл шабуылдың салдары үшін жауапкершілік пәкістандық әскерилердің мойнында болатынын мәлімдеді.

11 қазаннан бастап екі ел де Дюранд сызығы бойындағы — Кабул мойындамайтын шекара желісінде — атыстар мен қарулы қақтығыстар болғанын  хабарлап келеді.

19 қазанда Катар Сыртқы істер министрлігі Дохада өткен келіссөздердің алғашқы кезеңінде Пәкістан мен Ауғанстан  атысты дереу тоқтату туралы келісімге келгенін растады.

Біз бұған дейін Пәкістан мен Ауғанстан арасындағы қақтығыстан қандастар жапа шегіп, түрмеге тоғытылып жатқаны туралы жазған болатынбыз.