Әуежайда қызды кепілге алған ер адам 10 жылға дейін сотталуы мүмкін

Алматыдағы әуежайда шу шығарған 67 жастағы ер адамға қандай жаза тағайындалуы мүмкін екені айтылды, деп хабарлайды Orda.kz. 

7 наурызда Алматы халықаралық әуежайының рейс алдындағы тексеру аймағына жолаушы атын жамылып кірген ер адам әуежай қызметкерін кепілге алды. Пышақпен қаруланған қылмыскерді 52 жастағы Мұса Әбдірайым залалсыздандырған болатын. Алматы әуежайында шу шығарған қылмыскер 67 жастағы Машрапбек Баратов екен.

Алматы қалалық полиция департаменті әуежай қызметкеріне шабуылдаған ер адам былтыр автобуста әйелге тап берген адам екенін растады. 2024 жылы желтоқсанда оның бостандығы бір жылға шектеліп, үй қамаққа алынған. Полицияның мәліметінше, зейнет жасына шығуы ер адамды жазадан құтқармайтын көрінеді. Себебі қоғамдық ортада бұған дейін де тәртіп бұзған.

Енді пробациялық бақылауды бұзғаны анықталса, ер адам 10 жылға дейін бас бостандығынан айырылуы мүмкін. Ал кепілге алынған қыздың денесіне қандай да бір зақым келген болса, жаза тіптен ауырлай түспек. 

Бұған дейін әуежайдың баспасөз қызметі зардап шеккен әуежай қызметкеріне Алматы халықаралық әуежайының психологы қызметін ұсынғанын және барлық қажетті көмек көрсетеліп жатқанын хабарлаған.