Әуе кемесіне лазер мен дрон қолданғандар 10 жылға дейін сотталуы мүмкін

Бас прокуратура лазер немесе дрон қолдану арқылы ұшақтың ұшуына кедергі келтіргендер 10 жылға дейін сотталуы мүмкін екенін ескертті, деп хабарлайды Orda.kz.

Лазерлік құрылғыларды қолдану салдарынан ұшқыштар уақытша көру қабілетінен айырылып, бұл әуе апатына әкелуі ықтимал.

Қазақстанның авиациялық қызметтерінің мәліметінше, соңғы алты жыл ішінде жолаушылар лайнерлеріне қатысты осындай 98 оқиға тіркелген. Ең көп фактілер Алматы халықаралық әуежайында болған.

Бұған дейін заңнамада мұндай әрекеттер үшін арнайы жауапкершілік қарастырылмаған болатын. 16 шілдеде қабылданған заңға сәйкес Қылмыстық кодекске жаңа 352-1-бап енгізілді. Ол лазерлік құрылғыларды немесе ұшқышсыз ұшу аппараттарын пайдалана отырып, әуе кемесін басқаруға кедергі келтіруге қатысты қылмыстық жауаптылықты белгілейді.

Жаза қылмыстың ауырлығына қарай айыппұлдан бастап 10 жылға дейін бас бостандығынан айыруға дейін тағайындалуы мүмкін.