Әуе апатын зерттеу орынды жүргізіліп жатыр - Көлік вице-министрі

Әзірбайжаннан ұшып Ақтау маңына құлаған ұшақты зерттеу мейлінше орынды түрде өтіп жатыр. Бұл туралы ҚР көлік вице-министрі Талғат Ластаев Kazinform-ға берген сұхбатында айтып берді, деп хабарлайды Orda.kz.

Өз сөзінде вице-министр Халықаралық азаматтық авиация ұйымы да (ICAO) зерттеуге атсалысып жатқанын айтты. 

«Әуе апатын зерттеуге ИКАО стандартымен басшылық етеді. Чикаго конвенцияларының 13-қосымшасына сәйкес барлығы қатаң түрде болады», – деді Ластаев. 

Сондай-ақ Ластаев оқиға болған жерде Қазақстан өз бетінше зерттеу туралы шешім қабылдай алатынын да айтты.

«Тергеу барлық тараптардың пікірін ескере отырып, барынша объективті түрде жүргізіліп жатыр деп анық айтуға болады», – деді Ластаев. 

Вице-министрдің айтуынша, тергеудің алдын-ала қорытындысы 30 күн ішінде жариялануы тиіс. Сонымен қатар, авиация әкімшілігі қазақстандық әуе компанияларына мұндай оқиғаларды болдырмау үшін түрлі ұсыныстар тастайды.

Айта кетейік, Халықаралық әуе көлігі қауымдастығы (IATА) Ақтау маңында құлаған әзірбайжандық ұшақ туралы тәуелсіз және ашық тергеу жүргізу керектігін мәлімдеген болатын.