Ауғанстаннан келген қандастарда коронавирус жоқ

Ауғанстаннан атамекеніне келген қандастарымыздың ешқайсынан коронавирус дерті анықталмады. Бұл туралы Алматы қаласы санитарлық-эпидемиологиялық бақылау департаменті басшысының орынбасары Сәдуақас Байғабылов мәлімдеді.

Бұл туралы  Orda.kz  хабарлады.

— Келген 40 адамның 36-сы ПТР тест тапсырды. Талдау нәтижесі белгілі болды. Ешкімнен коронавирус анықталған жоқ. Барлық ПТР нәтижесі теріс, - дейді Сәдуақас Байғабылов.

9 қыркүйекте мемлекет басшысы Қасым-Жомарт Тоқаевтың тапсырмасымен Ауғанстаннан 35 этникалық қазақ тарихи отанына оралды. Оларды Қорғаныс министрлігінің арнайы ұшағы Кабулдан Алматы қаласына алып клді. Келген жолаушылар карантиннен өту үшін уақытша оқшауланған болатын. Артынша қандастарымыздың елге келген сәтінен видео жарияланды.

— Менің есімім Хасан, ұлтым қазақ. Ауғанстаннан келдім. Атамекенге келуімізге көмектескен Қазақстан президентіне, басқа қол ұшын берген адамдарға, журналистерге, Ауғанстандағы елшімізге рақмет айтамын, - дейді бейнежазбадағы ер адам.

Оның сөзінше, Қазақстанға анасы, екі інісі және қарындасымен келген. Ал әйелінің құжаты болмағандықтан Ауғанстанда қалып қойған.

— Біз Тахар қаласынан келдік. Комиссия шақырып, сұрақтар қойды. Руымызды, Қазақстанда туыстарымыз бар-жоғын сұрады. Ұлтым - қазақ, руым - қожа, - дейді қандас Хасан.

18 тамызда Қазақстан Ауғанстаннан елге  өзінің 25 азаматын және Қырғызстан, Ресей мен Литваның 16 азаматын эвакуациялаған болатын. Одан бөлек, Алматыға Кабулдан Ауғанстанға көмек көрсету жөніндегі БҰҰ Миссиясы (UNAMA) және басқа да халықаралық ұйымдардың кеңселері уақытша көшірілген болатын.