Ауғанстанды басып алған тәліптер әлем халқына үндеу жасады

Талибан қозғалысы халықтың өмірін жақсарту үшін Ауғанстанның экономикалық қалпына келуін назарда ұстауға уәде берді. Талибан қозғалысының өкілі Забихулла Мужахид осындай мәлімдеме жасады.

Бұл туралы Orda.kz хабарлайды.

– Талибан ұйымы Ауғанстанның ұрыс алаңы болғанын, сыртқы немесе ішкі жаулары болғанын қаламайды, - деді Талибан қозғалысының өкілі (Қазақстанда террористік ұйым ретінде тыйым салынған).

Сондай-ақ, олар Ауғанстанды елден қашып кеткен бұрынғы басшылыққа қарағанда жақсы басқаруға уәде берді.

Забихулла Муджахид ауған ұлтының 20 жылдық күресі арқылы шетелдіктердің ауған топырағынан шығуын мақтанышпен жеткізді. Сонымен қатар, тәліптер Ауғанстан аумағын басқа мемлекеттерге шабуыл жасау үшін база ретінде пайдалануға жол бермеуге уәде берді.

Муджахид талибандардың басқа мемлекеттермен байланысқа дайын екенін мәлімдеді.Талибандар барлық ауғандықтардың діни сенімдері мен рухани құндылықтарын құрметтеуге уәде береді.

Бұған қоса, тәліптер Ауғанстанда есірткі өндірісін тоқтатуға ниетті. Олар Америка Құрама Штаттарымен жұмыс істеген барлық ауғандықтардың қауіпсіздігіне кепілдік бере отырып, үйде болуға шақырды.