Ауғанстандағы Мазари-Шариф қаласы да тәліптер қолына көшті

Бұл ел аумағындағы көлемі жағынан төртінші ірі қала,  әрі Балх провинциясының орталығы. Тәліптер осылайша ел аумағының 90 пайызын өздеріне қаратты.  

Бұл туралы  Orda.kz Associated Press және Иран ақпарат құралдарына сілтей отырып  хабарлайды.

Сөйтіп бүгінгі осы күнде  Үкімет бақылауында ел астанасы Кабул мен шығыстағы Пәкістанмен шектесетін Нангархар провинциясының орталығы Жалалабад қана қалды.

Қазақстанның Ауғанстандағы елшісі Әлімхан Есенгелдиев басқаратын дипломатиялық миссия Кабулдағы жұмысын жалғастырып жатыр. Еліміздің Сыртқы істер министрлігінің хабарлауынша, қазақ елшілігінде шектеулі құрам қалған. Қызметкерлердің біраз бөлігі қауіпсіздік мақсатында дипмиссия ғимаратына бармай отыр.

– АҚШ президенті Байден әскерін алып кетемін деген сәттен бастап Талибан шабуылды бірден күшейтті. Ауғанстандағы соғыстың себеп-салдары өте күрделі. Адамның қаны судай төгіліп жатыр. Бұл қырғын 40 жылдан бері жалғасып келеді. Сыртқы алпауыт күштердің ауған жеріндегі тартысы азаматтық соғысқа ұласты. Ауғанстанның стратегиялық мүдделердің түйіскен жерінде, оның ішінде Орталық Азияда орналасқаны өзіне сор болып тұр. Менің ойымша, елдің тағдырын ауған халқы жан-жақты келіссөздер арқылы өз қолына алуы тиіс. Бұл – ішкі мәселе, -дейді сарапшы  Рамиш Салеми.

Түркия Ауғанстаннан ағылған босқындар нөпірін тоқтату үшін Иранмен арадағы шекара күзетін күшейте бастады. Аймаққа осы мақсатта түрік елінің Қорғаныс министрі Хулуси Акар келді. Түркияның Иранмен арадағы шекарасының жалпы ұзындығы 295 шақырым. Акар оның 64 шақырымына жыл аяғына дейін дуал тұрғызамыз деп мәлімдеді.

Біріккен Ұлттар Ұйымының Босқындар ісі жөніндегі агенттігі жыл басынан бері Ауғанстаннан 400 мың тұрғынның басқа елдерге бас сауғалап қашқанын мәлімдеді.