Ауғанстанда 45 мың этникалық қазақ өмір сүреді

Қоғам қайраткері Ауыт Мұқибек Ауғанстандағы этникалық қазақтардың санын шамалады.

Бұл туралы Orda.kz «31 арнаға» сілтеме жасап хабарлайды.

— Нақты дерек жоқ. Бірақ 2018 жылғы ақпаратқа қарағанда 45 мың қазақ бар деп жазылған. Бейресми ақпараттарда. Кемінде 50 мың қазақ болу мүмкін, – деді ол.

Оның айтуынша, Ауғанстандағы көптеген қазақтар ана тілін білмеуі мүмкін. Оның үстіне, олардың төлқұжаттарында қай ұлтқа жататындығы көрсетілмеген. Бұл жағдайда оларға «қандас» мәртебесін беру мүмкін емес.

— Қазіргі таңда, мынандай қиын жағдайда қайсы қазақ, қайсы басқа ұлт екенін ажырату әрине қиын болып кетті. Алдыңғы жылдары заң жобасы талқылап жатқан кезде, қазақ ұлтын анықтайтын нормаларын енгізуді ұсыныстар бердім. Қайта-қайта ұсыныс бердім. Президент әкімшілігі мен мәжіліс жағынан мақұлдамады, – деді Мұқибек.

Сонымен қатар, Қазақстан СІМ хабарлағандай, қазір Ауғанстан аумағында біздің азаматтарымыз жоқ.