Ауғанстан қорғаныс министрінің үйіне жасалған шабуылға кім жауапты?

Талибан содырлары Ауғанстан қорғаныс министрі Бисмиллах Хан Мохаммадидің үйіне жасалған шабуыл үшін жауапкершілікті өз мойнына алды.

Бұл туралы Orda.kz Deutsche Welle-ге сілтеме жасап хабарлады.

2005 жылы 15 наурызда Жоғарғы Сот шешімімен Талибан қозғалысына Қазақстанда тыйым салынған.

Топтың өкілі Забиулла Муджахид Twitter-де жоғары лауазымды шенеуніктерге қарсы жаңа шабуылдар жоспарланғанын айтты.

– Бұл елдің түрлі аймақтарында бейбіт тұрғындарға шабуыл жасауға тапсырыс беріп отырған Кабул әкімшілігінің негізгі тұлғалары мен басшыларына қарсы жауап берудің басталуын білдіреді, - делінген хабарламада.

Бұған дейін елдің Ішкі істер министрлігі Кабулдағы шабуылдан кемінде 8 адам қаза тауып, 20 адам жараланғанын хабарлаған.

Шабуыл бүлікші топ бірнеше провинцияның астаналарын басып алып, Ауғанстан бойынша ілгерілеуін жалғастырып жатқан кезде болды.

Айта кетсек, 3 тамызда кешке Кабулдағы Мохаммади үйінің жанында миналанған көлік жарылды. Осыдан кейін төрт содыр көрші үйге басып кіріп, күзетшілермен соғысқа кірісті. Министрдің өзі және оның отбасы бұл кезде үйде болмаған. Оқиға орнына кейін Ауғанстан қауіпсіздік күштері жетті. Қақтығыс шамамен төрт сағатқа созылды.

Ауғанстанда ауылдық жерлердегі елеулі аумақтарды басып алып, ірі қалаларға шабуыл бастаған үкімет әскері мен Талибан содырлары арасында қақтығыс бар. АҚШ әкімшілігінің 11 қыркүйекке дейін ауған жерінен әскерді шығаруды аяқтау туралы уәдесі аясында Ауғанстандағы тұрақсыздық күшейе түсті. 2020 жылы Вашингтон мен Талибан шенеуніктері Дохада 18 жылдан астам соғыстағы бірінші бейбіт келісімге қол қойды. Онда 14 айдан кейін шетелдік әскерлердің Ауғанстаннан шығарылуы және тұтқындар алмасқаннан кейін ауғанаралық диалогтың басталуы қарастырылған.

Бұған дейін Талибандар Ауғанстанның Герат қаласындағы БҰҰ кеңсесіне шабуыл жасаған.