Ауғандар пластикалық бөтелкеден жасалған сал арқылы Өзбекстанға қашып кеткен

Ауғанстаннан қашқан босқындардың бірнеше тобы Әмудария бойымен Өзбекстан шекарасынан пластикалық бөтелкелерден жасалған сал арқылы өтіп кеткен.

Бұл туралы Orda.kz хабарлайды.

– Белгілі болғандай, тапқыр ауғандар суы терең өзеннен өту үшін бос пластикалық бөтелкелерден жасалған салды қолданған, - делінген хабарламада.

Термез - Өзбекстанның оңтүстігіндегі қала, Ауғанстанмен шектесетін Сурхандария облысының әкімшілік орталығы. Екі елдің шекарасы Әмудария өзені бойымен өтеді, онда Термез мен Ауғанстанның Хайратон қаласы арасындағы көпір бар.

Тәліптер Ауғанстанды басып алғаннан кейін, Өзбекстан билігі Сурхандария облысында босқындар үшін шатырлы қалашық тұрғызған, онда қазірдің өзінде 150 -ден астам адам өмір сүріп жатыр. Сол аймақта 650 -ге жуық ауған әскери қызметкері де уақытша орналастырылды.

Бұған дейін Өзбекстан мен Германия билігі Ауғанстаннан азаматтарды көшіру бойынша ынтымақтастықты жалғастыруға келісті. 17 тамызда Ташкентке Кабулдан 125 жолаушысы бар бірінші ұшақ келді.