Ауған студенттері оқуын Қазақстанда жалғастыра алады

ҚР Сыртқы істер министрлігінің ресми өкілі Айбек Смадияров Ауғанстаннан келген студенттер оқуын жалғастыру үшін Қазақстанға қашан оралатынын айтты.

Бұл туралы Orda.kz хабарлады.

– Қазақстанда оқитын кейбір студенттер Ауғанстанға демалысқа кеткен. Біз оқуды жалғастырғысы келетіні туралы хабарлама алдық. Бұл мәселені бақылауда ұстаймыз. Ауғанстандағы жағдай тұрақтала салысымен біздің елшілік тиісті визаны міндетті түрде береді. Ал әуе қозғалысы немесе басқа көлік байланыстары қайта басталған кезде олар оқуын Қазақстанда жалғастыра алады, - деді Айбек Смадияров.

Бұған дейін Сыртқы істер министрлігі БҰҰ-ның Ауғанстанға көмек миссиясын (UNAMA) және ұйымның басқа қызметкерлерін қабылдауға Алматыны таңдаған себебін түсіндірді.

Сонымен қатар, Сыртқы істер министрінің орынбасары этникалық қазақтарды Ауғанстаннан көшіру қашан басталатынын айтты. Министрліктің мәліметінше, онда 13 отбасы тұрады.

Еске салсақ, «Талибан» қозғалысының (Қазақстан мен басқа елдердің аумағында тыйым салынған ұйым) содырлары Ауғанстанға кіріп, президенттік сарайды басып алды. Кейін олардың өкілі елдегі соғыстың аяқталғанын хабарлады.

Сондай-ақ, Қазақстанның Сыртқы істер министрлігі «Талибан» қозғалысын мойындамады деп мәлімдеді.