Атышулы Хасан ісіндегі жәбірленуші Шерзаттың әкесінің досы әрі сыныптасы екені белгілі болды

2021 жылы өзін ұрлап, ұрып-соғуды Хасан Қасымбаев ұйымдастырғанын мәлімдеген ММА спортшысы Арман Әлімов Шерзат Болаттың  әкесімен мектеп кезінен бері дос болған, деп хабарлайды Orda.kz дереккөздері.

Бұл мақалада біз оқиғаның қалай өрбігенін және жәбірленушілер туралы қандай жаңа мәліметтер шыққанын баяндаймыз.

Істің жаңа қыры – Әлімов пен қаза болған жасөспірімнің отбасы арасындағы болжалды байланыс. Дереккөздің айтуынша, ол Шерзатты жаттықтырған болуы мүмкін.

«Әлімов Шерзаттың әкесінің досы әрі сыныптасы», – деп түсіндірді сұхбаттасымыз.

Еске салайық, Қасымбаевқа қатысты «Адам ұрлау», «Денсаулыққа қасақана ауыр зиян келтіру» және «Бопсалау» баптары бойынша қылмыстық іс қозғалған болатын.

Жақында Арман Әлімовтің анасы Orda.kz-ке ұлының 2021 жылдың маусым айында ұрланып, соққыға жығылғанын айтты.

«Қазан айының соңында бізді Алматы облысының полиция департаментіне шақырып, қайтадан жауап алды. 2021 жылы 17 маусымда баламды ұрып-соғып, ұрлап әкетті. Оны елсіз жерге апарып, азаптады. Сот күресі үш жылға созылып, іс қайта ашылғанға ұқсайды. Біз айғақ бердік, ал менің ұлым қылмысқа тапсырыс берген адам ретінде Қасымбаевты көрсетті», – деді әйел.

Әлімовтің қылмыстық жолы

Бұл ретте Әлімовтің өзі бұрын қылмыстық жауапкершілікке тартылған болатын.

Orda.kz редакциясының қарауында сот құжаттары бар. Оларға сәйкес:

• 2009 жылы Алмалы аудандық соты оны қарақшылық жасағаны үшін 6 жылға бас бостандығынан айырды. Ол инкассаторға шабуыл жасап, 9 миллион теңгені қолды еткен;
• 2022 жылы есірткі саудасы үшін сотталды, бірақ ақталды;
• 2020–2021 жылдары бұрынғы серіктесіне қатысты жанжалдар мен қоқан-лоққылар үшін 3 рет әкімшілік жауапкершілікке тартылды.

Бүгін сондай-ақ Хасан Қасымбаевтың ісі бойынша екінші жәбірленуші пайда болғаны белгілі болды. Бұл туралы Әлімовтің адвокаты бірнеше БАҚ өкілдеріне хабарлады.

Orda.kz ақпарат көзі екінші жәбірленушінің 2016 жылғы оқиғаға қатысы бар екенін түсіндірді. Ол кезде іс «озбырлық» бабы бойынша тергелген, бірақ тараптардың татуласуына байланысты жабылған. Алайда қазір тергеу қайта ашылып, "бопсалау" санатына ауыстырылды.

«Хуторлықтармен» байланыс

Хасан Қасымбаевтың есімі 2024 жылдың қазан айында Талғарда 16 жастағы Шерзат Болаттың өлімінен кейін кеңінен танымал болды. Жергілікті тұрғындар оны қылмыстық әлеммен байланыстырады, алайда Қасымбаев Orda.kz сайтына берген сұхбатында бұл айыптауларды жоққа шығарды.

Тергеу жалғасуда.