«Атышулы алаяқ ұсталды»: Ресейден биыл жалпы 11 алаяқ әкелінді

Қазақстан Республикасының Бас прокуратурасы Ресей Федерациясынан алаяқтық жасады деген күдікпен қазақстандық әйелді қылмыстық жауапкершілікке тарту үшін әкелді.

Бұл туралы бас прокуратура хабарлады.

2019-2022 жылдар аралығында күдікті Тараз қаласындағы бір банктің филиалында жұмыс істеп, банк клиенттері атынан оларға несие рәсімдеген. Кейіннен қылмыскер банк клиенттерінің есепшоттарына қолы жетіп, несие қаражатын таныстарының есепшоттарына аударып, қолма-қол ақшаға айналдырған. Қылмыстық әрекеттер нәтижесінде банк клиенттеріне 60 миллион теңге көлемінде залал келтірілді

Қылмыс жасағаннан кейін ол ізін суытып, жасырынды. Сол себепті халықаралық іздеу жарияланды.

Осы жылдың сәуір айында күдікті Краснодар өлкесінде ұсталып, Қазақстан Республикасы Бас прокуратурасының сұранысы бойынша Қазақстанға жөнелтілді.

Қазіргі уақытта күдікті тергеу изоляторына қамалды. Оған тағылған қылмыс үшін мүлкін тәркілеу арқылы бес жылдан он жылға дейін бас бостандығынан айыру жазасы қарастырылған.

Бас прокуратураның хабарлауынша, биыл Ресейден Қазақстанға алаяқтық жасағаны үшін іздеуде болған 11 адам әкелінді. Олар азаматтарды салдарынан 350-ден астам жәбірленушіге шамамен 7 миллиард теңге шығынға ұшыратқан.