Атыраудағы KPI зауытынан полипропилен тиеген алғашқы пойыз экспортқа шықты

18 қарашада Атыраудағы «Kazakhstan Petrochemical Industries Inc» ЖШС (KPI) зауыты полипропилен тиелген 62 контейнерден тұратын, көлемі 1500 тонна болатын бірінші пойызды экспортқа жөнелтті.

Бұл ретте зауыт отандық өңдеушілер – «РГК-Каспий» ЖШС, «Универсал» ЖШС, «АЛФА ПЛАСТ» ЖШС өнімдерін жөнелте бастады. Зауыт басшылығы Қазақстанның ішкі нарығын полипропиленмен толық қамтамасыз етуді жоспарлап отыр.

Қараша айының соңына дейін ішкі және сыртқы нарыққа көлемі 9 мың тоннадан асатын тағы алты контейнерлік пойызды жөнелту жоспарлануда. Қазақстандық зауыт өнімінің сапасын кәсіпорын аумағында зертханасы жұмыс істеп тұрған швейцариялық SGS компаниясы растайды.

Еске салайық, KPI зауыты 8 қарашада жұмысын бастады және ол  газ-химия кешенінің алғашқы жобасы. Зауытта «ҚазМұнайГаз» Ұлттық компаниясы» АҚ өз үлесіне ие. Жұмысты президент Қасым-Жомарт Тоқаев Атырау облысына сапары барысында бастап берді. Кәсіпорынның жылына 500 мың тонна толық қуаттылығы жобаны әлемдегі ең ірі полипропилен өндірушілерімен қатар қояды.

Полипропилен машина жасауда, медицинада және электротехникада негізгі шикізаттардың бірі. Ол сондай-ақ орау материалдарын, ыдыстарды, талшықтарды, құбырларды, оргтехниканы, бақша және кеңсе жиһаздарын өндіруде, сондай-ақ құрылыс, тоқыма және тамақ өнеркәсібінде қолданылады.