Атырауда сарбаз мерт болды

Атырау облысындағы 20/16 әскери бөлімінде азаматтық борышын өтеп жүрген ақтаулық сарбаз Нұрбек Ерғалиевтың денесі жақындарына берілді.

Іnbusiness.kz басылымының хабарлауынша, 2003 жылы туған сарбаздың денесін әскерилер кеше ата-анасына табыстаған. Марқұм әскери борышын аяқтауға бір ай ғана қалған кезде мерт болған.

Оқиға әскери бөлімнен 80 шақырым жерде тіркелген. 5 сарбаз әскери тапсырманы орындауға аттанған. Оның ішінде Нұрбек Ерғалиев та болған. Жолда олардың көліктері бұзылып, марқұм Нұрбек пен оның командирі көмек шақыртуға жолға шығып кеткен.

«Жолда Нұрбек қатты әлсіреп, көз жұмады. Ал, командирі жолға дейін жетіп, көмек күтіп жатқан. Көлікте 7 литр су бар екен.  Барлығы бірге неге көлікте көмек күтпеді? Бір түсінбейтін жайт, 15 тамызда біздің бала сарбаздардың whatsapp чатынан шығып кеткен. Әскери бөлімге кешіккен соң көмекті күндіз сағат 12-де жібердік, марқұмның денесі кешке, сағат 18 шамасында табылды деп түсіндірді бізге. Көмек неге кеш көрсетілді?» дейді марқұмның туыстары.

Нұрбек Ерғалиевтың жақындары оның өліміне әскерилер кінәлі екеніне сенімді. Олар сараптама жүргізу керектігін алға тартып отыр.