Атырауда діни мерекені мектепте тойлаған директор сөгіс алды

Атыраудағы №8 қалалық мектептің оқушылары мен мұғалімдері «Масленица» мерекесін атап өту үшін білім ордасы ауласында от жаққан.

Ақ Жайық басылымының хабарлауынша, діни мерекені сөккендер жоқ, бірақ әлеуметтік желі қолданушыларын мұндай іс-шараның мектеп ауласында өткізілуі шамдандырған.

Атырау облысы әкімінің орынбасары Жасұлан Бисембиев Instagram-дағы тікелей эфир кезінде осы жайтқа қатысты түсініктеме берді. Оның айтуынша, мұндай іс-шараны мектепте өткізуге болмайды.

- Діни сипаты бар іс-шара мектептің ауласында өткен. Бірақ қауіпсіздікті сақтау үшін төтенше жағдайлар органдарымен келісілмеген. Атырау қалалық білім бөліміне де хабарланбаған. Мектептің директоры ата-аналар ұсынысын қолдап, білім ордасы ауласында алау жағуға рұқсат берген. Осыған байланысты мектептің директорына қатаң сөгіс берілді, - деді Жасұлан Бисембиев.

Әкім де мәселенің мәні діни мерекеде емес, ұйымдастырушылардың қызметіндегі олқылық екенін, білім ордасы ауласында алау тұтатуға болмайтынын айтты.