Атырау облысында VIP нөмірлерге 241 307 788 теңге төленген

Атырау облысының тұрғындары автокөліктердің VIP-нөмірлеріне 241 миллион теңгеден астам қаржы жұмсаған.

«Азаматтарға арналған үкімет» мемлекеттік корпорациясы» КЕАҚ Атырау облысы бойынша филиалы баспасөз қызметінің мәліметінше, 2022 жылы 856 жергілікті тұрғын жалпы сомасы 241 307 788 теңгеге VIP нөмірлер сатып алған.

Бір жыл бұрын осы  облыс тұрғындары 249 335 283 теңгеге әдемі әріптік және цифрлық тіркесімі бар 961 мемлекеттік тіркеу нөмірін сатып алған.

Жаңа 2023 жылдан бастап АЕК ұлғаюына байланысты сан мен әріп тіркесіміне байланысты VIP нөмілердің  құны 196 650 теңгеден 983 250 теңгеге дейін өзгереді. Тұрақты нөмір 9660 теңге тұрады.

Нөмір иесі оны сыйлыққа бере алмайды немесе үшінші тұлғаға сата алмайды. Егер көлік сатылса, иесі жаңа көлікті сатып алмас бұрын оны арнайы ХҚО-да 6 айға дейін сақтай алады.