Атырау облысында 556 мемлекеттік қызметкер табысын жасырмақ болған

Атырау облысында 556 мемлекеттік қызметкер табысын жасырмақ болды, деп хабарлайды Хабар 24 телеарнасы.

Жалпы декларацияның бірінші кезеңінің қорытындысы бойынша жеті маман әкімшілік жауапкершілікке тартылды. Барлығы салық органдарына әртүрлі ведомстволардың 17,5 мың қызметкері есеп берді.

Еске салайық, жаңа жылдан бастап бюджеттік қызметкерлер табыстары мен қатар мүлкі туралы ақпаратты да береді: мұғалімдер, дәрігерлер, спорт және мәдениет қайраткерлері, сондай-ақ квазимемлекеттік және ұлттық компаниялардың қызметкерлері.

— Рәсімнің негізгі мақсаты - сыбайлас жемқорлықтың алдын алу, көлеңкелі экономикамен күресу, сондай-ақ кірістердің жүйелілігін тексеру. Шетелдегі қаражат пен мүлікті анықтауға болады, - деді Мемлекеттік кірістер департаментінің басшысы Нұрболат Сарманов.

Бұдан бұрын хабарланғандай, Қазақстанда 2027 жылдан бастап декларацияда кірістер мен шығыстар сәйкес келмеген жағдайда мемлекеттік қызметшілерге қатысты жауапкершілік күшейтіледі. Нормалар сыбайлас жемқорлыққа қарсы күрес және адамдардың қауіпсіздігін қамтамасыз ету мәселелері бойынша Парламент қабылдаған түзетулерге негізделген.