Атыраулық алаяқтар зейнетақы қорынан жүздеген миллиард ақшаны қолды қылды

Атырауда «Бірыңғай жинақтаушы зейнетақы қорынан» қаражатты заңсыз шешіп алуға жәрдем көрсеткен 5 қылмыстық топтың әрекеті әшкереленді, деп хабарлайды Orda.kz. 

Қылмыстық топ жалған құжаттар рәсімдеп, Атырау, Астана, Алматы, Шымкент, Ақтау және елдің басқа қалаларында орналасқандай етіп, 30-дан астам стоматологиялық клиникаларды пайдаланған. Бұл медицина ұйымдары тек қағаз жүзінде ғана болған. Олардың тіпті ғимараттары, жабдықтары, білікті қызметкерлері де болмаған. Ал жалған клиникалардың «басшылары» мен құрылтайшыларының медициналық білімі де жоқ.

Күдіктілер жалған медициналық құжаттарды рәсімдегені үшін азаматтардың алған қаражатынан 10%-дан 20%-ға дейін заңсыз сыйақы ұстап отырған.

Нәтижесінде жалпы 200 млрд теңгеден астам қаржы айналымнан шығарылған. Зейнетақы салымшыларының ақшасына күдіктілер жалпы құны 600 млн теңгеден астам 15 қымбат автокөлік (Mercedes-Benz G-class, GLE, BMW X7, Porsche Taycan, Cadillac Escalade) пен зергерлік бұйымдар, коммерциялық нысандар, пәтерлер мен жер телімдерін сатып алған.

ҚМА мәліметінше, қазіргі уақытта 59 тінту жұмысы жүргізілді. 10 адамға қатысты бұлтартпау шарасы қолданылмақ. 

Айта кетейік, Жамбыл облысында 15 жастағы қыз Ұлттық ұлан экс-қызметкерінен босанды.