Атыраулық журналист Олеся Вертинская соққыға жығылды

Бір фирмаға қатысты қорқыту хабарламасын алған журналист Олеся Вертинскаяны Атырауда белгісіз ер адам соққыға жыққан.

«Әділ сөз» сөз бостандығын қорғау халықаралық қорының дерегіне қарағанда, оқиға журналистің үйінің маңында болған.

«19 шілде күні «Дорожный контроль» ақпараттық порталының тілшісі Олеся Вертинскаяны өз үйінің жанында соққыға жыққан. Ол үйден шыққан кезде белгісіз жігіт келіп көмек сұраған, артынша қатты соққымен бетінен ұрған. Соққыдан соң Олеся құлаған, ал шабуылдаушы оны тепкілей бастаған. Әйелді сол маңнан өтіп бара жатқан адам құтқарып қалады, ал жедел-жәрдемді Олесяның ұлы шақырған. Компьютерлік томография журналистің мұрнының қисайып, сынғанын анықтады» делінген қор хабарламасында.

Олеся Вертинская полицияға арызданған.

Шабуыл болғанға дейін бірнеше күн бұрын, 16 шілдеде Олеся бейтаныс нөмірден бір ЖШС мен оның иесіне қатысты істе «абай бол» деген хабарлама алады. Сол күні Олеся прокуратураға арызданып, өз өміріне қауіп төніп тұрғанын айтады.

Ал 13 шілдеде №1 қалалық полиция бөлімінің полиция қызметкерлері 667 ҚР ӘҚБтК (құқық қорғау органы немесе арнаулы мемлекеттік орган, әскери полиция органы қызметкерінің (әскери қызметшісінің), сот приставының, сот орындаушысының заңды өкіміне немесе талабына бағынбау) бабы бойынша Вертинскаяға қарсы сотқа дейінгі тергеуді бастады.

— Мен прокуратураға шағым жаздым, содан кейін прокуратура бұл істі жойып жіберді. Қазір қызметтік тергеу жүріп жатыр. Менің ойымша, мұның барлығы қаңтар айында мені азаптаумен және Атырауда қызмет ететін ақтаулық сарбаз Медет Амангелдімен болған жағдайды жария етуіммен байланысты, - дейді журналист.