Атырауда полицейлер көпірден секіріп кеткен қызды құтқарып қалды

Атырауда 14 жастағы қыз көпірден секіріп кетпекші болған. Бірақ оны полиция қызметкерлері құтқарып қалған.

12 желтоқсан сағат 22:20 кезінде 14 жастағы жасөспірім Жайық өзеніне секіріп кеткен. Куәгерлер бірден полицейлерді көмекке шақырған.

Патрульдік полицейлер Исатай Тұрсынғалиев және Ғалым Қалбаев судың ішін қарап, батып бара жатқан қызды тапқан. Олар еш ойланбастан баланы құтқаруға тырысқан.

Ғалым көліктегі арқан жіпті алып, беліне байлап, қыздың артынан көпірден секірген. Арқанның екінші ұшын оның әріптесі Исатай ұстап, сақтандырып тұрған. 20 минут ішінде қыз құтқарылған.

Полицейлер жасөспірімге алғашқы көмек көрсетіп, артынша жедел жәрдемді күтпестен оны №5 емханаға алып кеткен.

«Ойланатын уақыт болмады. Құтқарамыз деп бірден суға түсуге кірістік. Су мен ойлағаннан да салқын болып шықты. Бірақ бар ойым батып бара жатқан қызды құтқару болды. Әріптесім арқанның екінші ұшын ұстап тұрды, кейін артымнан жүзіп келе жатқанын сезіп тез қимылдап жағаға үшеуміздің де аман-есен шығуымыз үшін барлығын жасадым. Уақыт санаулы болды» деді Ғалым Қалбаев. 

Әзірге қыз баланың не себепті өзіне қол жұмсамақшы болғаны белгісіз. Ол ауыр хәлде ауруханаға жеткізілген.