Атыраудың мал базарында сібір жарасы анықталды

Атырау қаласындағы мал базарларының бірінде өлген малдан сібір жарасы анықталды. Қазір базарда мамандар тексеріс жүргізіп жатыр, деп хабарлайды Orda.kz.

Qazaqstan.tv мәліметінше, 12 қараша күні мал базарының қызметкері көршілес БҚО-дан әкелінген сиырдың өліп жатқанын байқаған. Содан төрт күн өткеннен кейін мал дәрігерлері бірден сынама алып, экспертизаға жіберген. Базарда қазір 56 сиыр, 79 ұсақ мал, 7 жылқы бар.

Төрт-түліктің базарда тұрғанына бір жетіден асқан. Бұл өз кезегінде қалтаға да оңай соқпай тұр, дейді кәсіпкерлер. 

«2 аптаға жабамыз деп жатыр. Жабылғасын жем-шөбін кім береді. Жауып жатқан адамға жауап бересіңдер ме десек, жоқ дейді. Оның бәрі шығын»дейді кәсіпкер Махамбет Мақатов.

Ветеринарлық бақылау және қадағалау комитетінің мәліметінше, қала карантинге жабылмайды.

«Базар жабылды, қазір толықтай екпе егіліп, 14 күн бақылауға алынады. Сосын дезинфекция жұмыстары жүргізіледі. Басқа жерден ауру анықталған жоқ»,деді комитет басшысының уақытша міндетін атқарушы Нұркен Баяров.

Бұдан бөлек  мамандар мал иелерін де тексеріп жатыр. Қалада ауқымды 5 мал базары бар. Олар да жақын арада толық тексеріліп, дезинфекция жүргізіледі.