Атыраудың бұрынғы әкімі алаяқтық жасағаны үшін ұсталды

Прокуратура Атырау қаласының бұрынғы әкімі Қайрат Оразбаевты жер қатынастары саласында алаяқтық жасады деген күдікпен ұстады.

Orda.kz ақпарат көздерінің хабарлауынша, оны 9 қарашада Атырау облысы прокуратурасының қызметкерлері ұстаған. Қазіргі уақытта экс-шенеунік уақытша ұстау изоляторында отыр.

Қайрат Оразбаев 2020-2022 жылдары әкім қызметін атқарған. Қаңтардағы тәртіпсіздіктерден кейін ол берген арызы негізінде қызметінен босатылды.

Оразбаев Атырау қаласының әкімі болып тағайындалғанға дейін негізінен мұнай саласында жұмыс істеген. Мұнай және газ өнеркәсібі министрлігі аппаратында, «ҚазМұнайГаз» ұлттық компаниясында, «ҚазақОйл», «Атырау мұнай өңдеу зауыты» ЖШС-де басшылық қызметтер атқарған.

Естеріңізге сала кетейік, биылғы жылдың қыркүйек айында Атырауда жер телімдерін заңсыз сатқаны үшін үш шенеунік ұсталған болатын.