Атыраудағы «Самұрық-Қазына Өндеу» еншілес компаниясына 7 млрд теңге айыппұл салынды

Атырау облысы бойынша экология департаменті «Karabatan Utility Solutions» ЖШС-не (KUS) жоспардан тыс тексеру жүргізді. Шығарындыларды шектен асырғаны үшін компанияға 7 млрд теңге айыппұл салынды, деп хабарлайды Orda.kz AtyrauPress-ке сілтеме жасап.

Қазақстан Республикасы Экология және табиғи ресурстар министрлігі Экологиялық реттеу және бақылау комитетінің баспасөз қызметі хабарлағандай, тексеру барысында СО2 шығарындыларының көлеміне Экология және табиғи ресурстар министрлігімен келісілген квоталар 35 482 тонна көлемінде белгіленген, ал кәсіпорыннан шығарындылардың нақты көлемі 743 105,874 тонна болғаны анықталды.

«Karabatan Utility Solutions» ЖШС көміртегі квотасының белгіленген (бөлінген) көлемдерінен артық  пайдаланды. Осы факті бойынша департамент акт жасап, заң бұзушылықты жою туралы ұйғарым шығарды. Сонымен қатар, әкімшілік жауапкершілікке тартылды. ҚР ӘҚБтК-нің 329-бабы бойынша іс қозғалды» делінген хабарламада.

Атырау қаласы әкімшілік құқық бұзушылық істері жөніндегі мамандандырылған сотының қаулысымен компания мемлекет кірісіне өндіріп алынған 7 млрд теңге көлемінде айыппұл түрінде әкімшілік жазаға тартылды.

Компанияның сайтында «Karabatan Utility Solutions» ЖШС 2014 жылы құрылғаны және «Самұрық-Қазына Өндеу» ЖШС (бұрынғы «Біріккен химиялық компания» ЖШС) еншілес кәсіпорны болатын «Самұрық-Қазына» Ұлттық әл-ауқат қоры» АҚ компаниялар тобына кіретіні айтылған. Атырау облысындағы «Ұлттық индустриалды мұнай-химия технопаркі» арнайы экономикалық аймағының инфрақұрылымдық нысандары құрылысы» жобасын іске асыру мақсатында «Karabatan Utility Solutions» ЖШС АЭА «НИНТ» өндірістік және жалпы зауыттық инфрақұрылым объектілерін салу бойынша оператор болып белгіленген. 

2018 жылы «Karabatan Utility Solutions» ЖШС «Samruk–Kazyna Constructions» АҚ сенімгерлік басқаруына берілді. 2020 жылдан бастап компания операциялық кезеңге өтіп, толығымен өзін-өзі қамтамасыз ету режимінде.

Бұған дейін Нығматулин компаниясына күкірт қышқылын ауаға таратқаны үшін 5 миллион теңге көлемінде айыппұл салынған болатын. Тексеру барысында «Қазфосфат» ЖШС табиғатты қорғау заңнамасын бұзған бес факті анықталды. Жамбыл облысы экология департаменті 11 шілдеде Таразда күкірт триоксидінің бөлінуіне әкеп соқтырған сорғылардың бірі апатты түрде тоқтап қалғаннан кейінгі кәсіпорын қызметін тексеруді аяқтады.