Атыраудағы орталық мешітте педофилдің жаназасы шығарылған: ҚМДБ ресми жауап берді

14 сәуір 2026 14:40 Альфия Адамбек

Фото: әлеуметтік желіден

Атырауда орталық мешітте педофилді соңғы сапарға шығарып салу рәсімі өтті деген ақпаратқа бірнеше күн үнсіздіктен кейін Қазақстан мұсылмандары діни басқармасы (ҚМДБ) жауап берді, деп хабарлайды Orda.kz NewTimes.kz сайтына сілтеме жасап.

Діни басқарма марқұмның педофил екенін, яғни екі өгей қызына қатысты қылмыс үшін 25 жылға сотталғанын имамдар білмегенін мәлімдеді.

«Марқұмның туыстары «Иманғали» орталық мешітіне кезекші имамға жаназа намазын оқып беруді сұрап жүгінген. Олар марқұмды Жылыой ауданына апарып жерлейтіндерін айтқан. Марқұмның кім екені, өмір жолы немесе сотталғаны туралы ешқандай ақпарат берілмеген», деп хабарлады ҚМДБ.

Діни басқарма имам жаназа намазын оқығанда адамның өткен өміріне баға бермейтінін баса айтты.

Сондай-ақ, ҚМДБ марқұмның денесі мешіттің ішіне кіргізілмегенін нақтылады.

«Жаназа рәсімі мешіт ғимаратының ішінде емес, ауласында өткізілді. Одан кейін туыстары денені өздері алып кеткен. Мешіт қызметкерлері жаназа ұйымдастыру кезінде тек сол сәтте берілген ақпаратқа сүйенеді және әр адамның жеке дерегін толық тексеруге мүмкіндігі жоқ», деп хабарлады басқарма.

Айта кетейік, бұған дейін, тергеу изоляторында қаза тапқан, екі өгей қызын зорлағаны үшін сотталған Дабыл Жәрдемұлы Атырау әкімі Шәкір Кейкиннің туысы екені хабарланған.

Қылмыскердің әкім Шәкір Кейкиннің алыс туысы болғанымен, туған ағасы емес екені айтылды.

Куәгерлердің айтуынша, жерлеу рәсіміне жүздеген, кей деректер бойынша мыңдаған адам қатысқан. Олардың арасында мемлекеттік қызметкерлер де болуы мүмкін деген ақпарат бар. Отбасы қылмыстық істің мән-жайын ашық айтпағандықтан, келгендердің бәрі марқұмның сотталғанын білмеген.

51 жастағы Дабыл Жәрдемұлы өгей қыздарын зорлағаны үшін сотталған. Бірақ ол жазасын өтеуге жіберілмей жатып жаппай төбелеске қатысып көз жұмды.

Оқи отырыңыз:

Жаңалықтар

барлық жаңалықтар