Атыраудағы қайғылы оқиға: «Ескерткіш бір баланы мерт қылып, бірін мертіктірді»

26 маусымға қараған түні Атыраудағы Жеңіс саябағында eскерткіш құлап екі баланы басып қалды.

Бұл туралы Orda.kz тілшілері хабарлады.

Марқұм 7 жасар бала облыстық балалар ауруханасында көз жұмды. Ал 9 жасар баланың қолы сынып, ауруханаға жатқызылды. Қазір бұл факті бойынша тергеу амалдары жүргізілуде. Сот-медициналық сараптама жасалады. 

Еске сала кетейік, «Естелік аллеясы» Атырауда 2020 жылғы Жеңістің 75 жылдығы күніне арналып, пандемия кезінде ашылды. Карантинге байланысты ашылу рәсіміне облыс әкімі Махамбет Досмұхамбетов пен қала әкімі Қайрат Оразбаев қатысты. Әкімдікте атап өтілгендей, «Естелік аллеясында» орнатылған ескерткіштер кәсіпкерлер мен демеушілердің қаражатына жасалған.