Атырауда зорлап күйеуге берген 15 жасар мектеп оқушысына қатысты іс қозғалды

Бұл ақпарат әлеуметтік желіде тарап кетті. Қазіргі уақытта қыздың жүктілігі төрт айға жеткен, деп хабарлайды Orda.kz тілшісі.

Қыздың айтуынша, оны 20 жастағы ер адам зорлап, содан кейін жәбірленуші полицияға арызданған. Алайда, зорлаушының туыстарының өтінішімен жәбірленушінің анасы арызын қайтарып алып, қызын сол адамға күйеуге берген.

«Жүктілік бойынша есепке тұрғым келгенде, дәрігерлер полиция шақырды. Тергеу басталды, бірақ енем тергеушіге пара берді», 
— деді мектеп оқушысы.

Қыздың айтуынша, оны ұрып-соғып, ата-анасының үйіне қайтарып жіберген. Қазір ол жігіттің жазаланғанын қалайды.

Атырау облыстық полиция департаменті бұл факті бойынша қылмыстық іс қозғалғанын растады.

«Тергеудің бастапқы кезеңінде жәбірленуші тарап сот-медициналық және психиатриялық сараптамалардан бас тартты бұл қылмысты толық тергеуге қажетті кешенді тергеу шараларын жүргізуге кедергі келтірді. Әлеуметтік желіге тараған ақпараттар тексеріліп, қайта тергеу жүргізілгелі жатыр»,  деп хабарлады полиция.