Атырауда жолға таласып, төбелес шығарған жүргізушілерді арнайы жасақ ажыратып алды

17 қараша күні таңертең, шамамен сағат 10:00-де Атыраудағы Баймұханов көшесінде Hyundai мен Toyota жүргізушілері жолға таласып, жанжал шығарды, деп хабарлайды Orda.kz.

Hyundai көлігінің жүргізушісі артынан келе жатқан Toyota-ға әдейі жол бермей, тежегішті қайта-қайта басып отырған. Соның салдарынан жүргізушілер сөзге келіп, ұрыстың арты жанжалға ұласады. Сол кезде Hyundai-ды тізгіндеген 24 жастағы жігіт 38 жастағы Toyota иесінің қолын сындырып жіберген. Дәл сол сәтте оқиға орнына жеткен «Арлан» арнайы жасағы төбелескен азаматтарды ажыратып алды.

Жедел жәрдем келіп, жарақат алған жүргізушіге алғашқы медициналық көмек көрсетілді.

Атырау облыстық ПД-нің мәліметінше, екі жүргізуші де бір-біріне жол бермей, озбырлық танытып, керісіп қалған соң жанжал туған.

Тәртіп бұзушы №2 қалалық полиция бөліміне жеткізілді. Ал көлік айыптұраққа қойылды. Оған қатысты «Бұзақылық» бабы бойынша сотқа дейінгі тергеу басталды.