Атырауда үйінен шыққан 24 жастағы жігіт із-түзсіз жоғалып кетті

Атырауда 24 жастағы Жасұлан Үмбетовті іздестіру жұмыстары төртінші күн қатарынан жүріп жатыр. Туыстары оның өміріне қауіп төніп тұр деп қорқады, деп хабарлайды Orda.kz тілшісі.

Жігіт төрт күн бұрын үйінен шығып кеткен. Содан бері оны ешкім көрмеген. Оның өміріне алаңдаған отбасы бірден полицияға жүгінген. Бұл туралы Жасұланның ағасы Аслан Үмбетов мәлімдеді.

«Жасұлан үйден шығып кетіп, қайта оралмады. Телефонын тастап кеткен, құрылғы жадысын толық тазалап, барлық контактіні өшіріп тастапты. Біз бірден полицияға хабарластық. Екі сағаттан кейін оның жүзі Алмагүл ықшам ауданындағы бейнебақылау камерасына түсіп қалғанын білдік», — дейді Аслан.

Осыдан кейін Жасұлан ешбір камераға түспеген. Қаланың көшелерінде, дүкендерде, қоғамдық көліктерде де көзге түспеген. 

Отбасы қатты алаңдап отыр. Туыстарының айтуынша, соңғы тоғыз айда Жасұлан ойынға тәуелді болып қалған. Букмекерлік қосымшалар арқылы бәс тігіп, қомақты қаржысын шашқан.

«Біз бүкіл қаланы шарладық, достарынан сұрастырдық, бұрынғы әріптестеріне хабарластық. Ешкім ештеңе білмейді. Біз шыдап отырмыз. Бірақ уақыт зымырап өтіп барады», — дейді туыстары.

Полиция жоғалған адамға қатысты арыз түскенін растады:

«2001 жылы туған азаматтың хабар-ошарсыз кеткені туралы өтініш 26 шілде күні сағат 21:00-де түсті. Қазіргі уақытта іздестіру шаралары жүріп жатыр»,  деп хабарлады Полиция департаменті.

Жасұланның жақындары Атырау тұрғындарына үндеу жолдады: