Атырауда үйді өртеген қылмыскер өмір бойына бас бостандығынан айырылуы мүмкін

Екі бала қаза тапқан пәтерді өртеп жіберген әйелдің танысы болып шықты, деп хабарлайды Orda.kz тілшісі.

Индер аудандық полиция бөлімінің жедел-тергеу тобы үйдің жанынан бензин қалдықтары бар ыдыс тапты. Кейін бейнекамералар көмегімен 31 жастағы азаматтың жанармай құю бекеттерінің бірінен бензин сатып алғаны анықталды.

«Жедел іздестіру шаралары барысында күдікті Орал қаласына келе жатқан жерінде бірден ұсталып, уақытша ұстау изоляторына қамалды» деп хабарлады Атырау облыстық полиция департаменті. 

Оның үстінен адам өлтіру, яғни заңсыз қасақана жасалған адам өлімі, екі немесе одан да көп адамға қатысты аса қатыгездікпен, басқа адамдардың өміріне қауіпті жолмен, төтенше жағдайда жасалған қылмыс бойынша қылмыстық іс қозғалды.

Бұл баптың санкциялары өмір бойына бас бостандығынан айыруды қарастырады.