Атырауда ұшты-күйлі жоғалып кеткен тұтастай бір отбасы туралы жаңа мәлімет шықты

Атырау облысында ұшты-күйлі жоғалған отбасы жайлы жаңа мәлімет шықты. Әлеуметтік желіде отбасы мүшелерінің SIM-карталарының геолокациясы Өзбекстанда екені анықталып, Бали аралында банк картасының қолданылуы мүмкін екені айтылып жатыр, деп хабардайды Orda.kz.

Атырау облысы Қызылқоға ауданына қарасты Жангелдин ауылынан жоғалған тұтастай бір отбасының ісіне қатысты жаңа деректер пайда болды. Бұл мәліметтер әлеуметтік желіде кеңінен таралып, жергілікті тұрғындар арасында алаңдаушылық туғызып жатыр.

Нақтырақ айтар болсақ, әлеуметтік желі қолданушыларының бірі өзін Атыраудан шыққан IT-маман ретінде таныстырып, жоғалған отбасының ұлы Наурыздың SIM-карталары әлі де пайдаланылып жатқанын мәлімдеген. Оның айтуынша, байланыс нөмірлерінің геолокациясы Өзбекстан аумағында тіркелген, сондай-ақ WhatsApp мессенджерінде күніне бірнеше рет белсенділік байқалыпты.

Отбасының туыстары да жоғалғаннан кейін белгісіз біреулер қараша және желтоқсан айларына тиесілі зейнетақы төлемдерін шешіп алғанын хабарлады. Сонымен қатар, үйдегі мал басы WhatsApp арқылы сатылған екен. Айтуларынша, хат-хабарлар осы отбасының ұлының атынан жазылыпты.

Жарияланым авторы ресми дерекқорларда Қазақстан шекарасын кесіп өту фактілері тіркелмегенін алға тартады. Алайда ол Түркістан облысы арқылы Өзбекстанға бейресми жолдармен өтуі мүмкін деген болжам айтады. Бұл ақпарат ресми түрде расталған жоқ.

Сондай-ақ, әлеуметтік желіде отбасының күйеу баласы жоғалған әйелдің банк картасын Қазақстаннан тыс жерде, соның ішінде Бали аралында пайдалануы мүмкін деген мәлімет тарады. Бұл деректер де әзірге ресми органдар тарапынан расталмаған.

Еске сала кетейік, 2025 жылдың қазан айынан бері Атырау облысы Жангелдин ауылының тұрғындары — Мақсот Қарабалин, оның жұбайы Насип Үтешқалиева және олардың балалары Мирагүл мен Наурызбен ешқандай байланыс жоқ. Туыстарының айтуынша, отбасы кенеттен жоғалып кеткен және басқа жаққа көшу жоспары туралы ешкімге айтпаған екен.

Атырау облысының полиция департаменті аталған төрт адамды ресми түрде іздеуге жариялады. Құқық қорғау органдарының мәліметінше, тергеу және жедел-іздестіру шаралары Қазақстан аумағында ғана емес, шетелде де жүргізіліп жатыр.

«Іздеу жұмыстары жалғасуда. Азаматтарды тек ресми ақпаратқа ғана сенуге шақырамыз», деп қысқа қайырды полиция.