Атырауда тұрғындар Ленин ескерткішін сүруге қарсы шықты

Атырауда 1981 жылы «Жилгородок» шағын ауданындағы саябаққа орнатылған Ленин ескерткіші 2009 жылы Мәдениет және ақпарат министрлігінің арнайы комиссиясы шешімімен тарихи-мәдени ескерткіштер тізімінен алынса да, оны сүруге жергілікті тұрғындар қарсы шығып отыр, деп хабарлайды Orda.kz тілшісі.

Атырау облысының мәдениет басқармасы бұл ескерткіштің тарихи-мәдени құндылығы жоқ екенін түсіндіріп, жақын арада қала әкімдігіне оны бұзу туралы ұсыныс жолданатынын хабарлады.

«Нысан бұрыннан мәдени мұра мәртебесінен айырылған, алайда қоғамдағы түрлі пікірлерді ескере отырып, әлі күнге дейін сақталып келген. Енді оның апатты жағдайын ескерсек, бұзу мәселесі өзекті болып тұр», — деді ведомство өкілдері.

Алайда қала тұрғындарының пікірі екіге жарылды. Бірі монументті алып тастап, саябақты абаттандыру қажет дейді.

«Оның орнына заманауи балалар алаңын немесе фонтан орнатқан дұрыс. Жастар мен балалары бар отбасылар үшін бұл әлдеқайда пайдалы. Бұл ескерткішті ешкім маңызды деп санамайды», — дейді шағын аудан тұрғыны Айман Қайрат.

Ал басқалары, керісінше, ескерткішті сақтап қалуды жөн санайды.

«Кеңес өтіп кеткенімен, бұл – қала тарихының бір бөлігі. Оны алып тастау – жадымызды өшірумен тең. Реставрация жасап, мәдени нысанға айналдыруға болар еді», — дейді зейнеткер Серік Мұхит.

 Атыраудағы Ленин ескерткішінің болашағына қатысты әзірге нақты шешім қабылданбады.

Еске сала кетсек, бір жыл бұрын Павлодарда тұрғанына 100 жылдай болған Лениннің мүсіні құлаған еді.