Атырауда үстіне сорпа құйылған 9 жасар бала күйіктен қайтыс болды

Бала сорпа құйылған қазанды қағып кетіп, қатты күйіп қалған. Атырау облыстық балалар ауруханасының дәрігерлері оның өмірі үшін арпалысып күрескенімен, баланы аман алып қала алмады, деп хабарлайды ATPress.kz.

Облыстық балалар ауруханасы өкілдерінің айтуынша, бала мекемеге 9 маусымда түскен, ол жансақтау бөліміне жатқызылған. 14 маусымда бала қайтыс болды.

— Күйік аумағы 50-55 пайыз болды. Баланың жағдайы өте ауыр. Біз Нұр-Сұлтандағы мамандармен үнемі байланыста болдық, қажетті ем жүргіздік. Дегенмен баланы аман алып қалу мүмкін болмады, - дейді травматология бөлімінің меңгерушісі Сергей. Хван.

Атырау облыстық балалар ауруханасының дәрігерлері ауыр науқастарды күйік орталығы бар Нұр-Сұлтанға жібере алмайтындығына алаңдап отыр.

— Елордадағы аурухана қалалық аурухана мәртебесіне ие болғанымен, оларда барлық қажетті құрал-жабдықтармен қамтылған тұтас бір бөлім бар.Біздің дәрігерлер қолдан келгеннің бәрін жасауда, бірақ біздің бөлімде қажеттінің бәрі жоқ. Бәрі науқастың жағдайының ауырлығына байланысты. Нұр-Сұлтандағы күйік орталығында жағдай жақсырақ. Жағдайы ауыр науқастарға сол жерде көмек көрсетуге болады. Біз емделушілерді сол жаққа жіберу үшін олардың дәрігерлерімен келіссөз жүргіздік, бірақ нәтиже болмады. Өйткені олардың аурухана мәртебесі аймақтардан науқастарды қабылдауға  мүмкіндік бермейді. Бұл мәселе барлық өңірде бар, сондықтан оны министрлік деңгейінде шешу керек, - дейді Сергей Хван.

Сондай-ақ дәрігерлер өткен жылмен салыстырғанда балалар арасында күйік жарақатының 1,5 есеге артқанын атап өтті. Жыл басынан бері Атырау облыстық балалар ауруханасына түрлі күйік шалған 200-ге жуық бала келген.

Амиржан Мухмаммед