Атырауда өртенген бума шөптің арасынан үш баланың мәйіті табылды

Атырау облысының Махамбет ауданында бума шөп өртеніп, үш бала қайтыс болды. Ақпаратты төтенше жағдай министрлігінің ресми өкілі Талғат Уәли мәлімдеді.

Бұл туралы Orda.kz хабарлайды.

2021 жылдың 5 қазанында сағат 19:27-де кезекші пультіне Махамбет ауданы, Ортақшыл ауылының Жаскеленов көшесіндегі үйдің ауласына жиналған 22 бума шөп жанып жатқаны туралы хабар келіп түскен.

Оқиға орнына №11 ӨСБ-нің өрт сөндірушілері 18 минуттан соң жеткен, өрт кешкі 23:07 шамасында толығымен сөндірілген.

«6 қазан күні 00 сағат 02 минутта Махамбет аудандық полиция бөлімінен Ортақшыл ауылында кәмелет жасына толмаған 3 баланың белгісіз жағдайда жоғалғандығы туралы хабарлама келген. Іздестіру жұмыстарына ТЖД 11 қызметкері, 3 бірлік техникасы, кинологтар, полиция департаменті қызметкерлері мен ауыл тұрғындары жұмылдырылды. Жоғалған 2014 жылғы екі бала мен 2012 жылғы бір баланың денесі өртенген шөптің арасынан табылды. Олардың денесі сот-медициналық сараптамасын жүргізу үшін  ПД қызметкерлеріне тапсырылды» делінген ТЖМ баспасөз қызметінің хабарламасында.