Атырауда полицияның тергеуінен кейін жоғалып кеткен жігіт табылды

Атырау облысының полиция департаменті 5 желтоқсанда жоғалып кеткен ер адамның табылғаны туралы хабарлады. Жарияланған видеода ол шаруаларымен жүріп қалғанын айтқан.

Видеода жас жігіт үйінен жұмыс бабымен кеткенін айтып, әлеуметтік желідегі ақпаратқа сенбеуге шақырды.

«30 қараша күні сағат 18:00-де ол жұмыс орнынан шығып, ата-анасына үйге бет алғанын айтып, жоғалып кеткен. 3 желтоқсанда оған іздеу жарияланған. Атырау полицейлері жүргізген іздестіру жұмыстарының нәтижесінде жоғалған азамат 5 желтоқсанда табылды» деп хабарлады полиция департаменті.

Белгілі болғандай, 29 қарашада Атырауда Шығыс Қазақстан облысы полиция департаментінің тапсырысы бойынша полицейлер ер адамнан жауап алған. Полицейлер одан шоттағы қаражатқа қатысты банктен анықтама алып келуді сұраған. Бірақ жас жігіт бөлімге келмеген.