Атырауда полицей қызметкерін көлік қағып кетті

Атырауда қарбалас уақытта жол қозғалысын реттеп тұрған полицей қызметкерін көлік қағып кетті, деп хабарлайды Orda.kz.

30 қыркүйек күні сағат 18:40-та Toyota Corolla көлігінің жүргізушісі Сәтпаев пен Ерниязов көшелерінің қиылысында қызметін атқарып тұрған патрульдік полицей қызметкерін қағып кеткен. Оқиға салдарынан полицей түрлі жарақаттар алып, облыстық ауруханаға жеткізілді.

«Жол апаты бойынша тиісті құжаттар жиналып жатыр. Сараптама нәтижелеріне сәйкес іс сотқа жолданып, шешім қабылданатын болады»,  деп хабарлады Атырау облыстық полиция департаменті.

Жүргізушінің күннің шағылысуынан жол қозғалысын реттеп тұрған полицейді байқамағанын айтып, болған жағдайға өкінетінін жеткізді.