Атырауда өзгертілген Қазақстан туымен даулы суретке түскен никабтағы қыздар полицияға жеткізілді

Атырауда даулы суретке түскен төрт күдікті анықталып, полицияға жеткізілді, деп хабарлайды Orda.kz.

«Төрт күдікті анықталып, полицияға жеткізілді», – деп мәлімдеді Orda.kz құқық қорғау органдарындағы дереккөзі.

Бұған дейін Атырауда никаб киген қыздардың Қазақстан туымен суретке түсуіне байланысты ҰҚК іздеу жүргізіп жатқаны хабарланған.

Еске салсақ, Атырауда мұз айдынында төрт қыз никаб киіп, Қазақстан туымен суретке түсті. Алайда бұл ту әдеттегідей емес еді. Тудың жоғарғы бөлігінде араб жазулары мен қылыштың бейнесі бар. Жазу стиліне қарағанда, бұл – шахада, яғни ислам сенімінің символы: «Алладан басқа құдай жоқ, Мұхаммед – оның елшісі» деген сөз.

Бұл фото әлеуметтік желілерде қызу талқыланып, үлкен қоғамдық резонанс тудырды. Көпшілік мұндай жағдайға неге құқық қорғау органдары назар аудармайтынын сұрауда. Себебі мемлекеттік туды қолдану ережелерін аздап бұзғанның өзінде айыппұл салынуы немесе жаза қолданылуы мүмкін.

Дау туған соң ҰҚК мен Атырау облысының полиция департаменті бірлескен тексеру бастады. Мемлекеттік символдарға құрметсіздік көрсету бабы бойынша қылмыстық іс қозғалды.

Сондай-ақ, даулы туды қыздар Instagram дүкенінен сатып алғаны белгілі болды.