Атырауда мұғалім педкеңестен кейін суицид жасамақшы болды

Атырауда №37 орта мектептің ағылшын тілі пәні мұғалімі педкеңесте әріптесі тарапынан қорланған соң суицид жасамақшы болып тамырын кескен, деп хабарлайды Orda.kz.

Кеңес барысында қазақ тілі пәнінің мұғалімі  ағылшын тілі пәнінің мұғалімі Сандуғаш Мұратованы алаяқтық жасады деп айыптаған. Оның айтуынша, мұғалімге қатысты бір ер адам келіп, Мұратова туралы әшкерелейтін ақпарат жеткізген. Жәбірленушінің әріптестері оны қорғауға тырысып, әңгімені тоқтатуды талап еткен, алайда мектеп директоры тексеруді жалғастыруға мүмкіндік берген.

«Ол мені педкеңес барысында қорлады. Осыдан кейін шыдай алмадым. Бұған дейін мектеп директоры маған "қолы өте ұзын" деп айтқан болатын. Бұл мен үшін қатты қорлау болды, басқа амал таппадым. Әріптестерім мені қолдады, бірақ директор кеңесті аяқтаудан бас тартты», — деп бөлісті Сандуғаш Мұратова Orda.kz тілшісіне.

Бұл педкеңесте оқушылардың тәртібі мен үлгерімін талқылау жоспарланған еді, мұғалімдердің жеке мәселелерін қозғау көзделмеген болатын.

«Олар мені біреуден ақша алып, қайтармады деп айыптады. Егер мен заң бұзған болсам, құқық қорғау органдарына жүгіну қажет еді, педкеңесте мәселені қараудың қажеті жоқ еді. Директор әдейі басқа мұғалімге мен туралы осындай сөздер айтқызды. Барлық кінәлілерді, соның ішінде директорды да жауапкершілікке тартуды талап етемін», — деп қосты Мұратова.

Педкеңестен кейін шамамен 20:00-де мұғалім өзін-өзі өлтіруге әрекеттенген. Қазіргі уақытта ол ауруханада жатыр.

Orda.kz тілшісі полиция департаменті, білім басқармасы және қалалық білім бөлімінен түсініктеме алуға тырысты, алайда мақала жарияланған сәтке дейін жауап берілмеді.