Атырауда марқұм адамның атына жол ережесін бұзғаны үшін айыппұл келді

Полицияға Атырау қаласының 64 жастағы тұрғыны хабарласқан. Ол марқұм күйеуінің атына жол ережесін бұзғаны үшін айыппұл келетінін айтты. Белгілі болғандай, біреу оның көлігінің нөмірін тауып алып, өзіне орнатып қойған.

Құқық бұзушы 20 жастағы ВАЗ-21114 жүргізушісі болып шықты. Оның көлігі Ресейде тіркелген. Жас жігіттің айтуынша, ол көшеден қазақстандық нөмірді тауып алып, оны өзіне орнатып алған. Ол бөтен нөмірмен жүріп, 351 мың теңгелік 16 айыппұлға іліккен.

Тәртіп бұзушыға 20 АЕК көлемінде айыппұл салынып, бір жылға жүргізуші куәлігінен айрылады.

Атырау облыстық полиция департаментінің бастығы Қамза Үмбетқалиевтің айтуынша, жыл басынан бері жалған немесе мемлекеттік нөмірі өзгертілген 20 көлік жүргізушісі анықталған.