Атырауда көлік иелерінің жанжалы өліммен аяқталды

Атыраудағы базарлардың бірінде екі ер адам арасында жанжал шығып, бірі қаза тапты.

Видеоны аймақтық «АҚ Жайық» басылымы жариялады.

Маусымның 11-і күні әлеуметтік желіде Атыраудағы базарлардың біріндегі бейнебақылау камерасына ер адамдар арасындағы жанжалды түсірген видео тарады.

Атырау облыстық полиция департаменті бұл факті бойынша қылмыстық іс қозғалып, тергеу жүріп жатқанын хабарлады.

«Күдікті уақытша ұстау изоляторына қамалды. Жәбірленуші алған жарақатынан ауруханада көз жұмды», – деп түсіндірді полиция департаментінің баспасөз хатшысы Мейірім Ердәулет.

Күәгердің айтуынша, жанжалға жәбірленушінің абайсызда екінші жүргізушінің  көлігін сырып кетуі себеп болған. Бейне жазбадан қаза тапқан азаматтың еш қарсылық көрсетпегенін көруге болады.