Атырауда кәсіпкерді өлтірген ер адам сотталуда

Атырау қаласында 39 жастағы ер адамның ісі бойынша сот отырысы өтуде. Ол базарда 57 жастағы кәсіпкерге шабуыл жасап, оны өлтірген, деп хабарлайды Orda.kz. 

Қайғылы оқиға 5 маусымда болған, Қызылқоға ауданы Қарабай ауылының тұрғыны Амандық Сағынғалиев Атырауға орталық базарға дүкеніне тауар алу үшін келген. Көлігін қояр кезде, ол ГАЗелімен жанында тұрған көліктің есігін байқамай соғып кетеді.  Куәгерлердің айтуы бойынша (және бейнекамера жазбаларына сүйенсек) көліктен Мұхтар Ахмедов атты ер адам шығып, Сағынғалиевті ұра бастайды. Бірнеше соққыдан кейін кәсіпкер жерге құлайды, алайда Ахмедов оны ұруын тоқтатпайды. Сағынғалиев ауруханаға жеткізілгенімен, көп ұзамай қайтыс болды.  

Айыптау актісіне сәйкес, Ахмедов Сағынғалиевке тоғыз соққы жасаған. Айыпталушы кәмелетке толмаған 5 баланың әкесі кінәсін ішінара мойындады. Оған 106-бабының 3-бөлімі, яғни «жәбірленуші өліміне әкелген ауыр дене жарақатын қасақана келтіру» айыбы тағылды.  

Қазір сот процесі жалғасуда, сот оқиға орнында болған жүргізушілер мен сатушыларды тыңдап жатыр. Бұдан кейін қылмыстық іс тараптарының мәлімдемелері тыңдалатын болады.  

Айыпталушы 8 жылдан 12 жылға дейінгі бас бостандығынан айырылып, мүлкі тәркіленуі немесе тәркіленбеуі де ықтимал. Қайтыс болған адамның туыстары ең қатаң жаза қолдануды талап етуде.  

«Біз тек жақын адамымыздан ғана емес, отбасымыздың асыраушысы мен тірегінен айырылдық. Біздің әкеміз мейірімді, адал адам болатын, ол ешкімге жамандық жасаған жоқ. Мұндай қатігездік салдарынан оның енді арамызда жоқ екеніне сене алмаймыз. Біз кінәлі адам заңда көрсетілген ең қатаң жазасын алсын деп талап етеміз», — дейді марқұмның ұлы.