Атырауда қайраңда қалып қырылған балықтарды құтқару жұмыстары қайта жанданды

Атырау облысында көктем сайын осы жағдай қайталанады – су деңгейінің төмендеуінен қайраңда қалған балық шабақтары адам көмегінсіз құтқарылмайды, деп хабарлайды Orda.kz тілшісі.

Адам араласпаса қайраңда қалған бұл балықтар тірі қалмайды. Биылғы құтқару жұмыстары Махамбет ауданында өтті. Мұнда жергілікті инспекторлар, балықшылар мен еріктілер бірігіп, жүздеген шабақты суға жіберді.

«Көктемгі тасқыннан кейін бөлініп қалған шалшықтардың бетінде шабақтар қалып қойған. Осы жағдай Махамбет ауданының 17-разъезі аумағында болды. Бірлескен күшпен құтқару жұмыстары жүргізілді. Қаза болған балықтар санитарлық талаптарға сәйкес жойылып, көмілді», деп хабарлады Балық шаруашылығы комитеті. 

Жеті келі өлі балық залалсыздандырылып, ең бастысы – 900 шабақ аман қалып, тірідей Жайық өзеніне жіберілді.