Атырауда бас қосқан сенаторларға мұнай иісі ұнамады

Атырауда жергілікті белсенді сенаторларға қала тұрғындарының шын мәнінде немен тыныс алатынын көрсету үшін мұнай иіскетті, деп хабарлайды Orda.kz.

26 сәуірде Атырауда Сенаттың аграрлық мәселелер, табиғатты пайдалану және ауылдық аумақтарды дамыту комитетінің көшпелі отырысы өтті.

Отырыс барысында жергілікті белсенді Таңат Нұрымов этил-метил-меркаптан құйылған ыдыспен сенаторлардың алдына шықты. Мұнайдың бұл компонентінде әрбір атыраулыққа бала кезінен таныс өткір иіс бар.

«Сенаторларға мұнайды иіскеп көруді ұсындым. Оларға ұнамады! Ал біз осы иіспен күнделікті, жылына 365 күн өмір сүреміз! Сенаторлар қолқаны қабатын ащы иісті иіскеп көруден де бас тартты», - деді Таңат Нұрымов.

Атырау тұрғындары қаладағы жағымсыз иістерге көптен бері шағымданып келеді. Билік үнемі тексеру жүргізеді, бірақ сасық иіс көздері үнемі табыла бермейді.