Атырауда ауруханада бір жасар балаға шамадан тыс көп димедрол салынып, мерт болды

3 наурыз Атырау облысы Қызылқоға ауданы ауруханасында 11 айлық сәби көз жұмды. Марқұм баланың әжесі Баян Шүкірғалиева немересінің өліміне дәрігерлерді кінәлап отыр.

Ол Ақ Жайық басылымына «немересі Ибраһим Берікке ақ халаттылар диагнозды қате қойып, дұрыс емдемегендігін» айтқан.

Қайғы жұтқан қарт ана дәрігерлердің үстінен облыстық прокуратураға шағым түсіріп, президент әкімшілігіне хат жолдаған. Қазіргі таңда оның өтініші қаралып жатыр.

Ауруханаға түскен күні бала құсып, тәбеті болмай, мазасы кеткен. Кешкі 23:30 шамасында бала қатты ауырғандықтан, отбасы жедел жәрдем шақырған. Фельдшерлер дәрі еккеніне қарамастан, бала құса берген. Түні бойы қызуы көтеріліп шыққан балаға анасы таңғы 05:00-де қайта дәрігерлерді шақыртқан. Баласы мен анасы Қызылқоға аудандық ауруханасына жеткізілген.

«Сол күні баланың жағдайы жақсарған соң келінім үйге шығуға дәрігерлерден рұқсат алды. 11-лер шамасында олар үйде болды. Алайда кешке бала қайтадан жылай бастады. Құсып, іші өтіп, қызуы көтерілді. Сағат 18:30 шамасында жедел-жәрдем шақырып, олар қайтадан баланы ауруханаға алып кетті. Баланың асқазанын тазарту үшін оған тамызғыш қоюды шешті. Медбикелер тамырын таба алмай баланы әбден қинады. Ол қайта-қайта жылап, тынышталмады. Осы кезде медбике баланы ұстап алып: «Болды, қой, неге жылайсың?» деп ұрысып тастады. Тамызғышты қоя алмағандықтан дәрігердің нұсқауымен олар оған регидрон бере бастады. Бірақ бала мазасызданып, іші тоқтамады» дейді марқұм баланың әжесі.

11 айлық Ибраһимнің ауруханада мазасы кеткендіктен, оның анасы дәрігерлердің рұқсатымен 3 наурыз күні үйлеріне қайтқан.

«Дәрігер бала тынышталса, үйде қалдыратынын айтты. Сондай-ақ, оның аш екенін айтып, оған жарма мен сүт беруге кеңес берді. Бала бергеннің бәрін жеді. Бірақ жылауын тоқтатпады. Мүлдем ұйықтамады. Содан кейін мен дәрігерден оның диагнозын сұрадым. Ол білмеймін деп жауап берді. Сонда мен баланы ұйықтату үшін димедрол екпесін сала ма деп сұрадым. Дәрігер балаға ондай екпені беруге болмайтынын айтты. Кейін немеремнің жағдайы нашарлаған соң оны ауруханаға жансақтау бөліміне жатқызды. Қатты уайымдадық, тіпті баланың анасы мен әкесіне ешкім ештеңе түсіндірмеді. Онымен кездесуге де кіргізбеді. Кейін оған димедрол екпесін бергенін естіген келінім «өздері болмайды деп айтып алып, сол екпені салғаны несі» деп ренжіген. Алайда дәрігер бала кішкене тынығып алсын деп жауап берген» дейді Баян Шүкірғалиева.

Баланың тыныс алуы қиындаған. Дәрігерлер оттегі беретін катетер іздей бастаған, алайда оны таппаған. Артынша бала димедролдан ұйықтап жатқанын айтқан. Анасына да тынығу керектігін айтып, шығарып салғанда, баланың денесу суи бастаған.

«Келінім баланың суық қолдары туралы дәрігерлерге айтқанымен, олар өзара бірдеңелерді талқылай бастады. 30-40 минуттан соң бүлдіршіннің қайтыс болғанын хабарлады. Дәрігерлер балаға димедрол дозасын артық берген. Олар мұны жасырғысы келеді, қателіктерін мойындамайды. Дәрінің артық мөлшерінен баланың қан қысымы 200-ге, дене қызуы 40-қа дейін көтерілген. Оның үстіне медбикенің шарасыз сәбиге ұрысып, жұлқылағаны тағы бар. Баламыздан айрылған соң келінім екеуміз шара қолдану үшін аурухана меңгерушісі Айгүл Төребекқызына жүгіндік. Емдеуші дәрігер Нұрила Серікқызы қандай диагнозбен емдегеніне жауап бере алмады. Сондықтан немерем Ибраһим қайтыс болды. Бәрі дәрігерлердің салғырттығынан» дейді Ибраһимнің әжесі.

11 айлық сәби отбасының жалғыз немересі болған.

«Қазіргі таңда аталған факті бойынша ҚР Қылмыстық кодексінің 317-бабы «Медицина қызметкерінің кәсіби міндеттерін тиісінше орындамауы, абайсызда адам өліміне әкеп соғуы» бойынша сотқа дейінгі тергеу амалдары жүргізілуде. Сәби өлімінің себебін анықтау үшін сот-медициналық сараптама тағайындалды. Нәтижелері әлі жарияланған жоқ» деп хабарлады Атырау облыстық полиция департаментінің баспасөз қызметі.

Облыстық денсаулық сақтау басқармасы арнайы тексеру комиссиясы құрылғанын хабарлап, оның қорытындысы шықпағанша, оқиғаға қатысты пікір білдіре алмайтынын айтқан.