Атырауда адвокат соттың шешіміне разы емес

5 ақпанда Атырауда бұрынғы полиция қызметкері, адвокат Айбар Қосымбаев облыстық прокуратура алдында «соттың әділетсіз шешіміне» наразылық білдіріп, жалғыз адамдық пикет өткізді. Ол пикетке «прокуратура – бейшаратура» деген жазуы бар плакат ұстап шықты.

Адвокаттың пикетке шығуына түрткі болған оқиға былтыр 12 желтоқсанда Атырау қаласындағы Махамбет және Шолохов көшелерінің қиылысында орын алған. Адвокат сотта үш жолақты жолдың бірінші жолағында көліктің ақауына байланысты амалсыз тоқтап, кейін авария белгісін жағып қозғалғанын айтып дәлелдей алмай жүр. Ол әзірге соттың қаулыны қолына бермегенін айтады. Қаулымен танысқаннан кейін шешімді апелляцияға бермекші.

Атырау қалалық әкімдігіне жалғыз адамдық пикет өткізетіні туралы өтініш жолдағанымен жергілікті билік рұқсат етпеген. «Әкімдік жауабында қанша адам қатысатыны көрсетілмегендіктен шараға рұқсат берілмеді деді. Бірақ мен өтініште пикетке тек өзім шығатыным туралы жазғанмын», - дейді Айбар Қосымбаев.

Прокуратура алдында плакат ұстап тұрған адвокатқа Атырау облыстық прокурорының орынбасары Бауыржан Жұмақанов шығып, оның іс әрекетінің заңсыз екенін ескертті. Прокурор ескертуінен соң Айбар Қосымбаев плакатын жинап кетіп қалды.