Атырауда 52 жастағы әйел тұңғышын дүниеге әкелді

Атырауда 52 жастағы әйел тұңғышын дүниеге әкелді.

ATPress.kz мәліметінше, 19 қаңтар күні әйел Атырау облыстық перинаталдық орталығына түскен. Мұнда оған шұғыл ота жасалып, ұл бала дүниеге келді. Жаңа туған нәрестенің салмағы үш келі 70 грамм, бойы 51 сантиметрді құрады.

Қазіргі уақытта ана мен бала үйде, жағдайлары жақсы. Облыстық перинаталдық орталықтың баспасөз қызметі әйел ұзақ жылдар бойы емделгеннен табиғи жолмен жүкті бола алмағанын айтты. Ал жасанды ұрықтандырудың арқасында ол жүкті болып, көптен күткен баланы дүниеге әкелді.

Еске салайық, 2020 жылы мемлекет басшысы Қасым-Жомарт Тоқаев елімізде арнайы «Аңсаған Сәби» бағдарламасын іске қосуды тапсырған болатын. Экстракорпоралды ұрықтандыру бағдарламасына квотаны жеті мыңға, яғни жеті есеге дейін ұлғайту міндеті қойылды.