Атырауда 4 дәрігерге қатысты сот үкімі шықты

Атырау облыстық ауруханасының  үш хирургі мен бір педиатры 11 айлық сәбидің өліміне  кінәлі деп танылды. Олар балаға  тиісті  дәрігерлік көмек көрсетпеген. Негізгі оқиға 2019 жылы желтоқсанда болған. 

Туыстары 11 айлық сәбиді белгісіз зат жұтып қойды деген шағыммен  ауруханаға үш мәрте әкелген.  Сол күнгі кезекші  дәрігерлер оны емдеу мекемесіне жатқызудан бас тартып, табиғи жолмен шығуын күтуге кеңес береді.

«Астана» телеарнасының мәліметіне сәйкес, сот кезінде дәрігерлер тағылған айыппен келіспеген. Бірақ, сараптама қорытындысымен сәбидің медициналық көмек уақтылы көрсетілмегендіктен көз жұмғаны дәлелденді.

– Қылмыстық Кодекстің 317 бабы 3 бөлігімен кінәлі деп танып, Тілеуғалиевқа, Адрисовке, Тәжгалиеваға, 2 жыл мерзімге, Зұлхашевқа 3 жыл мерзімге дәрігерлік қызметпен айналысу құқынан айыра отырып,  олардың әрқайсысына 2 жыл 6 ай мерзімге  бас бостандығынан айыру жазасы тағайындалсын. 2021 жылғы  7 желтоқсандағы №81-7 ҚР Тәуелсіздігінің 30 жылдығына байланысты «Рақымшылық жасау туралы» Заңының 2 бабының екінші бөлігі бірінші тармағына сай бас бостандығынан  айыру туралы негізгі жазадан босатылсын, - деді Атырау қалалық сотының судьясы Эльмира Ойқұлова.

Айта кетейік, облыстық денсаулық сақтау басқармасы басшысына келеңсіз жағдайлардың алдын-алу үшін  нақты шаралар қабылдау міндеттелді.