Атырау облысындағы газ ұңғымасында апат болды, зардап шеккендер бар

6 наурызда Батыс Прорва кен орнындағы ұңғымада газ шығып, өрт тұтанды, деп хабарлайды Orda.kz тілшісі.

Кейін «Ембімұнайгаз» АҚ баспасөз қызметі апаттық жұмыстар аяқталып, газдың шығуы тоқтатылып, нысан қауіпсіз жағдайға келтірілді деп сендірді.

Дегенмен компания зардап шеккендердің де бар екенін мәлімдеді.

«Батыс Прорва кен орнындағы №437 ұңғымада жою жұмыстары аяқталғаннан кейін оқиға болды. «ҚазТехМұнайСервис» ЖШС мердігерлік компаниясымен ұңғыманы жоюға дайындық жұмыстарының гидравликалық сынақтары кезінде сөндіру желісінің қысымы түсірілді. Салдарынан жұмысшылардың бірінің кеудесі көгерді, қуанышқа орай ішкі ағзалары зақымданбаған» деп жазылған хабарламада.

Қазір ол Құлсары қаласының орталық аудандық ауруханасында бақылауда. Оның өміріне қауіп төніп тұрған жоқ. Екінші қызметкер тексеруден кейін үйіне жіберілді.

Оқиға туралы ақпарат облыстық мемлекеттік еңбек инспекциясы жөніндегі департаментіне жолданды.